3 բարեփոխման ծրագիր ԱՆ-ում՝ 2011-ից

2011 թվականի հունվարի 1-ից երկրում մեկնարկելու է բարեփոխման երեք ծրագիր` Շտապ օգնության ծառայության արդիականացում, Երեխայի պետական հավաստագիր, որը Ծննդօգնության պետական հավաստագրի ծրագրի տրամաբանական շարունակությունն է, Համավճարի համակարգի ներդրում:

Այս մասին Panorama.am-ին ասաց առողջապահության նախարարի մամուլի քարտուղար Շուշան Հունանյանը:

Նրա խոսքով, այս մասին առողջապահության նախարար Հարություն Քուշկյանն ասել է օրերս Իսրայելի Մաշավ գործակալության ղեկավար, Իսրայելի արտաքին գործերի նախարարության միջազգային ծրագրերի վարչության պետի տեղակալ Հայմ Դիվոնի հետ հանդիպման ժամանակ:

Կարևորելով երկու երկրի միջև համագործակցության դրական փորձը և հետագա զարգացման անհրաժեշտությունը` Հ. Դիվոն առաջարկել է փորձագետներ փոխանակել անհետաձգելի բուժօգնության և հանրային առողջապահության կառավարման ուղղություններով ծրագրեր մշակելու, դասընթացներ կազմակերպելու համար:

Շ. Հունանյանը նշեց, որ պայմանավորվածություն է ձեռք բերել կազմակերպել բժիշկների համար փորձի փոխանակման, վերապատրաստման դասընթացներ:

Նշենք, որ Հ. Քուշկյանն առաջարկել է դիտարկել նաև առողջապահության ֆինանսավորման և մանկական հեմոֆիլիայի ծրագրերի շրջանակներում փոխգործակցության հնարավորությունը:

Հարցեր, պատասխաններ, մեկնաբանություններ